Сенат депутаты Сергей Карплюк былтыр Ұлттық қордан бөлінген мақсатты трансферт заңмен тыйым салынған шараларға жұмсалғанын мәлімдеді.

Мәселен, Ұлттық қордан бөлінген мақсатты трансферттен сотталғандарды ұстауға – 2,3 млрд теңге, мәдениет нысандарын салу мен жөндеуге – 315 млн теңге (оның тек 10 пайызы ғана игерілген), әлеуметтік маңызы бар және мәдени шараларға, соның ішінде шет елдерде мәдениет күндерін өткізуге 2,5 млрд теңге бағытталғаны туралы фактілер кездеседі, - деді сенатор.

Ұлттық қордан ақша алатынымыз аздай, оны заңға қайшы пайдаланамыз деп отыр ол. Демек қазір Ұлттық қор өзінің негізгі жинақтаушы функциясын орындамай, дәстүрлі тұтыну режимінде тұр.

Сондай-ақ сенатор пайдаланылмаған қаржыны Ұлттық қорға қайтару жұмысы да әлсіз екенін жеткізді. Айтуынша, 2015-2021 жылдар аралығында пайдаланылмаған және Ұлттық қорға қайтарылмаған қаржы сомасы 72,3 млрд теңге болған. Оның 60 млрд теңгеге жуығы тек 2021 жылдың еншісінде.