Қазан айында Ұлттық қорға 256 миллиард теңге түсіп, бірақ 641 миллиард теңге игерілген, деп хабарлайды Halyq Uni.

Қаржы министрлігінің мәліметінше, Ұлттық қордың көлемі 1 айда 31,37 триллион теңгеден 30,9 триллион теңгеге, яғни 385 миллиард теңгеге немесе 1,3% қысқарған.

Жалпы, кейінгі 10 айда Ұлттық қорға 5,8 триллион теңге түсті. Оның ішінде мұнай секторынан түскен салық түсімдері – 3,2 триллион теңге, инвестициялық кіріс – 2,5 триллион теңге.

Сонымен қатар, салық түсімдері 2023 жылдың сәйкес кезеңімен салыстырғанда 10%, ал 2022 жылмен салыстырғанда 34,4% азайған.

Бұл ретте Ұлттық қордан 4,67 триллион теңге, оның ішінде кепілдендірілген трансферттер түрінде (республикалық бюджет тапшылығын жабуға) 2 триллион теңге, нысаналы трансферттер түрінде (әлеуметтік маңызы бар жобаларды қаржыландыруға) 2,659 триллион теңге жұмсалды.

Сонымен, Ұлттық қордың қаражаты қазан айының соңында 30,9 триллион теңге болып, жыл басынан бері 3,7% өскен.