Олар өздеріне тиесілі көмекті ала алмаған
Павлодарда аз қамтылған отбасыларға жасалған кедергілер алынып тасталды, деп хабарлайды Halyq Uni.
Прокуратура азаматтардың әлеуметтік көмек алу құқығын шектейтін заңсыз құқықтық актілердің күшін жойды, деп мәлімдеді облыстық прокуратура.
Павлодар облысының прокуратурасы әлеуметтік жағынан осал азаматтардың коммуналдық шығыстары мен байланыс қызметтерін төлеу бойынша мемлекеттік көмек алу құқығын заңсыз шектеу фактілерінің жолын кесті, – деп қосты ведомство.
Прокуратураның талдауымен аумақтық мәслихаттардың нормативтік құқықтық актілерінде жасанды әкімшілік кедергілердің болуы анықталды. Аз қамтылған азаматтарға тиісті өтемақы алу үшін міндетті түрде белсенді жұмыспен қамту шараларына қатысу, күндіз оқу және жұмыссыз ретінде тіркелу қажет болған. Осындай кедергілер Конституция қағидаттарына қайшы келді және қолданыстағы заңнаманы бұза отырып қабылданды.
Прокурорлардың қадағалау актілері бойынша аумақтық мәслихаттар нормативтік құқықтық актілерге өзгерістер енгізді. Заңсыз шектеулер алынды. Нәтижесінде 2 мыңнан астам әлеуметтік жағынан осал азаматтың құқығы қорғалды.