Алматы қаласының Алмалы ауданында ақылы тротуар тұрақтары іске қосылады, деп хабарлады Tengrinews.kz.

11 желтоқсаннан бастап Алматы қаласының Алмалы ауданында ақылы тротуар тұрағы минутына төленеді. Бұл ауданда 27 аймақ, 6 504 тұрақ орны жұмыс істей бастайды. Оның 454-і – мүмкіндігі шектеулі адамдар үшін.

Ақылы тротуар тұрағының жұмыс тәртібі: күн сайын сағат 8:00-ден 19:00-ге дейін. Бір сағаттың құны – 100 теңге. Уақытты есептеу көліктің автотұрақ аймағына тоқтаған сәтінен басталады. Ақысын алғашқы 15 минут ішінде төлеу қажет.

Тұрақ орны үшін алдын ала төлеу мынадай тәсілдермен жүргізіледі:

• «парковки Алматы» мобильді қосымшасы арқылы. Бұл қосымшаны Play Market немесе Apple Store телефондарына жүктеуге болады;
• almaty-parking.kz сайтында;
• Kaspi.kz мобильді қосымшасы арқылы ақпараттық тақталардағы QR-код бойынша;
• kassa 24 терминалы;
• Kcell, Activ, Beeline, Tele2, Altel абоненттерінің 1309 нөмірі бойынша SMS хабарлама жіберіп, тақтада көрсетілген тұрақ нөмірін * авто нөмірі * сағат санын көрсету арқылы ұялы шоттың теңгерімінен тұрақ ақысын төлеуге мүмкіндік бар.

Тротуар үлгісіндегі тұрақтар басқа аудандарда кезең-кезеңімен іске қосылады.

Бұзушылықтар автоматты режимде, мобильді кешендермен (арнайы авто) тіркеледі. Ақылы тұраққа ақша төлеуден жалтарғаны үшін айыппұл – 3 АЕК. Бір жыл ішінде қайталап бұзушылықтар болса, 5 АЕК мөлшерінде айыппұл салуға әкеп соғады.

Қалада алаңдық типтегі тұрақтар штаттық режимде жұмыс істейді. Резиденттік келісімдер мен абонементтерді ұйымдастыру мәселесі әзірленіп жатыр.