Соңғы үш жылда Қазақстан бюджетінен мемлекеттік органдардың автокөлікті жалдауға және сатып алуына 24 807 375 665 теңге жұмсалған.

«Әділдік жолы» республикалық қоғамдық бірлестігі Қазақстанда мемлекеттік органдар мен мекемелер автокөлік сатып алу мен жалдауға қанша қаржы жұмсап жатқанын анықтады. Нақтырақ, мемлекеттік сатып алулар порталында соңғы үш жылда орналастырылған тапсырыстарға мониторинг жүргізілді. Нәтижесінде соңғы үш жылда елімізде 24,8 млрд теңге бюджет қаржысы көлікті жалдауға және сатып алуға жұмсалғаны белгілі болды.

Қоғамдық бірлестіктің мәліметінше, 2020 жылы Қазақстанда көлікті жүргізушісімен бірге жалдауға 5 156 884 802 теңге, жүргізушісіз 310 598 405 теңге жұмсалған. 2021 жылы жүргізушімен 3 985 546 307 теңге, жүргізушісіз 424 895 165 теңгеге жалданды. Ал биыл бес айда бюджеттің 404 666 437 теңгесі автокөлікті жүргізушісіз жалдауға, сондай-ақ 3 512 414 167 теңге қаржысы автокөлікті жүргізушісімен бірге жалдау үшін жұмсалғаны белгілі болды.

Көлікті 2022 жылы көлікті жүргізушісімен бірге жалға алған ТОП-10 мемлекеттік мекеменің қатарында Жоғарғы сот, Конституциялық кеңес аппараты, Президент іс басқармасы, Нұр-Сұлтан қаласы бойынша соттар әкімшілігі, Республикалық фитосанитариялық диагностика және болжамдар әдістемелік орталығы көш бастап тұр. Сондай-ақ тізімде «Eco Almaty» ЖШС, «ҚазАвтоЖол» ҰК» АҚ, Павлодар облысы әкімінің аппараты мен Алматы қаласы Денсаулық сақтау басқармасының «Фтизиопульмонология орталығы» бар.

Көлікті жүргізушісіз жалған алған мекемелердің үздік ондығының басында «Азаматтарға арналған үкімет корпорациясы тұр. Биыл бес айда бұл мекеме 39 911 048 теңгеге жалға көлік алған. Одан кейін медициналық мекемелер мен коммуналдық мекемелердің ең көп сома жұмсағаны белгілі болды.

Жалға алудан бөлек, қазақстандық мекемелер бюджет қаржысына автокөлік сатып алып жатқанын айта кетеу керек. Мәселен, соңғы үш жылда мекемелер автокөлік сатып алуға 11 012 370 382 теңге бюджет қаржысын жұмсаған, нақты айтсақ: 2020 жылы - 4 653 135 699 теңге, 2021 жылы - 6 076 663 598 теңге, ал 2022 жылдың қаңтар-мамыр айларында - 282 571 085 теңге. Бұл сомаға нақты қандай маркалы көлік сатып алынғаны туралы ақпарат жоқ, дәлірек айтсақ жасырылған. Тек санаты, көлемі мен трансмиссиясын байқауға болады. Қазақстандықтар көбіне А, В, С, D санатына жататын автоматты трансмиссия, механикалық және электр қозғалтқышы бар көліктерге тапсырыс берген. Сондай-ақ кейбір тапсырыстың сипатында жол талғамайтын, көлемі 3000 шекте см дейін деп жазылған.