Кентауда мұғалімдер 2 ай бойы жалақысыз жұмыс істеп келген. Оның себебі айтылмаған. Тек таяуда кінәрат облыстық адами әлеуетті дамыту басқармасынан болғаны анықталды. Бұл туралы Otyrar.kz хабарлады.

Педагогтер Түркістан облысындағы барлық мұғалім осындай проблемаға тап болғанын айтады. Ұстаздар қауымы Оқу-ағарту министрлігіне, прокуратураға және облысқа жүгінген, бірақ одан нәтиже болмапты. Күні кеше облыстық адами әлеуетті дамыту басқармасының өз атауын білім департаментіне ауыстырып жатқаны белгілі болды. Осыған байланысты көптеген құжат пен мөрлерді өзгертуге тура келген. Осыдан кейін ғана қазынашылық мұғалімдердің шоттарына ақша аудару үшін код бере алды екен.

Кеше бізге жалақы төлеуге рұқсат беретін код келді. Біздің қарамағымызда 23 мектеп бар, ауыл мектептері жалақы алып үлгерді, өйткені олардың бухгалтериясы орталықтандырылған. Жан басына қаржыландыру бойынша жұмыс істейтін мектептер сәл кейінірек алады, - деді Кентау қаласы білім бөлімінің әдіскері Ғазиза Қалымбетова.