Жамбыл облысында 900 млн теңге мөлшерінде бюджет қаражатын ұрлау фактісі бойынша қылмыстық іс сотқа жолданды, деп хабарлады Halyq Uni тілшісі.

Жамбыл облысы прокуратурасының мәліметінше, ведомствоның үйлестіруімен облыстық Экономикалық тергеп-тексеру департаменті таңқурайдың элиталық сортын отырғызуды субсидиялауға бөлінген бюджет қаражатын жымқырудың қылмыстық схемасын анықтаған.

Нәтижесінде шаруа қожалықтарының жер телімдерінде таңқурайдың отырғызылмағаны, көшеттердің мүлде сатып алынбағаны анықталды. Өздерінің қылмыстық әрекеттерімен 4 адамнан тұратын топ, 2 жыл ішінде мемлекетке 900 млн теңгеден астам шығын келтірген, – делінген прокуратура хабарламасында.

Биыл 7 сәуірде аталған факті бойынша Қылмыстық кодекстің 190-бабы 4-бөлігінің 2-тармағы, 216-бабының 3-бөлігі және 218-бабы 2-бөлігінің 2-тармағымен сотқа дейінгі тергеп-тексеру басталды. Тергеу барысында барлық күдікті қамауға алынып, олардың жалпы құны 1,9 млрд теңге болатын мүлкі бұғатталды. 12 қыркүйекте қылмыстық іс айыптау актісімен аяқталып, негізінен қарау үшін сотқа жолданды.

Қылмыстық-процестік кодекстің 201-бабына сәйкес, өзге мәліметтер жариялауға жатпайды.

Еске сала кетсек, бұған дейін Жамбыл облысында 800 млн теңгеден аса ауыл шаруашылығы субсидияларына жалған шот-фактура жазып берген алаяқтар ұсталғанын хабарлаған болатынбыз.