Астанада 10 тұрғын үй кешенін салушы компания басшыларына қатысты қылмыстық істер тергеліп жатыр, деп хабарлады Halyq Uni тілшісі.

Елорда прокуратурасының мәліметінше, 2019 жылдан бері проблемалы жылжымайтын мүлік саны 150-ден 32-ге, ал алданған үлескерлер 16 мыңнан 4 мыңға дейін қысқарған. Осы кезеңде прокуратура 4 мың 993 үлескердің мүддесіне 48,5 млрд теңгеге 125 талап-арыз жолдады.

Уәкілетті органмен 2019-2023 жылдары үлескерлерден ақша тартуға хақысы жоқ 149 компания әкімшілік жауапкершілікке тартылды. Өткен кезеңде 4 құрылысшы сотталды, – делінген прокуратура хабарламасында.

Бүгінде полицейлермен 10 тұрғын үй кешенін салушы компания басшыларына қатысты 7 қылмыстық іс тергеліп жатыр. 5 адам қамауға алынды. Олардың әрекетінен 426 азамат зардап шеккен.