Ұлттық банк 200 теңгелік банкнот пен монета заңды төлем құралы және қабылдануға міндетті екенін мәлімдеді.

Номиналы 200 теңгелік банкноттардың қабылданбай жатқаны туралы арыз-шағымға байланысты Қазақстан Ұлттық банкі олардың заңды төлем құралы саналатынын еске салады. Бұл банкноттар Қазақстанның барлық аумағында кез келген төлем түрі бойынша қабылдануға міндетті, - деп хабарлады Ұлттық банк.

Қазақстан аумағында ұлттық валюта банкноттары мен монеталарын белгіленген құнына қарай қабылдаудан бас тартқандар Әкімшілік құқықбұзушылық туралы кодекстің 206-бабы бойынша әкімшілік жауапқа тартылады.

Сондай-ақ Ұлттық банк номиналы 200 теңгелік жаңа банкноттарды айналымға шығармағанын атап өтті.

Айналымдағы 200 теңгелік банкноттар заңды күшін жойған жоқ әрі тозығы жеткенде ғана айналымнан шығарылып, 200 теңгелік монеталармен ауыстырылады, - деп түсіндірді Ұлттық банк.

Қосымша сұрақтар туындаса, 1477 нөмірі арқылы Ұлттық банктің байланыс орталығына хабарласуға болады.