Қарасай ауданында айып тұрағындағы көліктен 4,5 млн теңге жоғалып кеткен
Ұсталған ер адамның туыстары ақшаны аудандық ПБ автотұрағында жоғалды дейді
![](https://halyq-uni.kz/cache/imagine/1200/uploads/news/2023/07/19/64b785acb515d832293389.jpeg)
Алматы облысында полиция ғимараты маңында ер адамның көлігінен 4,5 миллион теңге жоғалып кетті, деп хабарлады Tengrinews.kz.
Құқық қорғау органдары бұл деректі тексеріп жатқанын растады.
2 маусымда Қарасай аудандық полиция басқармасына BMW X7 автокөлігіндегі белгісіз адамдар атыс қаруын заңсыз тасымалдап, сақтауы мүмкін екені туралы хабарлама түсті. Көлікті тексеру барысында 4 500 000 теңге көлемінде ақша болғаны, оны белгісіз біреулердің ұрлап алғаны туралы дерек анықталды, - деп мәлімдеді Алматы облысының ПД баспасөз қызметі.
Дерек ҚР ҚК-нің 188-бабы 3-бөлігінде көзделген қылмыстық құқықбұзушылық белгілері бойынша соталды тергеулердің бірыңғай тізіміне тіркелді.
Қазір қылмыстық деректі толық және жан-жақты анықтауға бағытталған жедел-іздестіру шаралары жүргізіліп жатыр, - деді полиция қызметкерлері.
Ұсталған ер адамның туыстары ақшаның Қарасай аудандық полиция басқармасының автотұрағында тұрған кезде көліктен жоғалып кеткенін жеткізген. Олардың айтуынша, көлік бір айдан аса уақыт сол жерде тұрған және 7 шілдеде эвакуатордың көмегімен айып тұрағына қойылған. Дәл сол кезде ірі көлемдегі ақша жоғалды деген дерек анықталған.