Ұлттық экономика министрі Әлібек Қуантыров ауылды дамытуға бөлінген қаржыны игере алмай отырған өңірлерді атады, деп хабарлады Halyq Uni тілшісі.

2023 жылғы 1 қаңтардағы жағдай бойынша Қазақстанда 6 293 ауыл бар, онда 7,8 млн-ға жуық қазақстандық тұрып жатыр.

«Ауыл-ел бесігі» жобасын іске асыру үшін болашағы бар 3,5 мың ауыл іріктеліп алынды. 2019 жылдан бастап оларды дамыту бойынша «Ауыл-ел бесігі» жобасы шеңберінде жоспарлы түрде басым тәртіппен жүзеге асырылуда», - деді министр Үкімет отырысында.

Министрдің айтуынша, жобаның мақсаты – инфрақұрылымды жаңғырту есебінен ауыл тұрғындарының өмір сүру сапасын жақсарту, ауылдарды өңірлік стандарттар жүйесі параметрлеріне жеткізу.

«Ол үшін 2019-2022 жылдары республикалық бюджеттен 326 млрд теңге бөлініп, 3,7 мың жоба іске асырылды. Мысалы, 334 тұрғын үй-коммуналдық шаруашылық объектісі, 1,2 мың әлеуметтік инфрақұрылым объектісі, 2,2 мың көлік инфрақұрылымы объектісі жаңадан салуға және жөндеуге мүмкіндік берді. Нәтижесінде шамамен 30 мың жұмыс орны құрылды», - деді Әлібек Қуантыров.

2022 жылы 577 ауылда бір мыңнан аса жобаны іске асыруға 128 млрд теңге бөлінген.

«Биыл 1 қаңтардағы жағдай бойынша облыс әкімдіктері бөлінген қаражаттың 94%-ын игерген. Қаражаттың толық игерілуі Атырау, Қостанай, Солтүстік Қазақстан, Түркістан облыстарында байқалды. Сонымен қатар, қаражаттың дұрыс игерілмеуі Ұлытау, Маңғыстау және Батыс Қазақстан облысында тіркелді», - деді ведомство басшысы.