Әлеуметтік кәсіпкерлік корпорациялары бюджет қаражатын банктерге депозитке салып, пайда көріп келген. Бұл туралы Мәжіліс депутаттарының сауалына жауап берген Сыбайлас жемқорлыққа қарсы іс-қимыл агенттігінің төрағасы Олжас Бектенов айтты.

Әлеуметтік кәсіпкерлік корпорациялардың көпшілігінің пайдасынан гөрі зияны көп. Өйткені ол негізінен банктердегі депозиттерге салынған бюджет қаражаты бойынша пайыздардың есебінен, сондай-ақ балансқа берілген мемлекеттік мүлікті сатудан құралады. Мәселен, «Shymkent» ӘКК акцияларын төлеуге кадастрлық құны 2 млрд теңге болатын 70 жер учаскесі (200 гектар) берілді. Оның ішінде 29 жер учаскесі (36,7 гектар) кейіннен кәсіпкерлік субъектілеріне 5,89 млрд теңгеге қайта сатылды, – деді агенттік төрағасы.

Оның айтуынша, 2019-2021 жылдары әлеуметтік кәсіпкерлік корпорациялардың банктердегі депозиттер бойынша пайыздар сомасы («Түркістан», «Ертіс», «Алматы», «Байқоңыр», «Тобыл», «Жетісу» және «Shymkent») 4,4 млрд теңгеге жетті. Ал жалпы пайда 5 млрд теңге болды. ӘКК-нің қызметі заң жүзінде реттелмеген. ӘКК-нің жетекшілері облыс әкімі тарапынан тиісті бақылау болмаған соң, жеке басының пайдасын ойлап, қасақана қылмыс жасап отырған.