Ол испаниялық Джессика Бузас Манейроға қарсы ойнайды
27 желтоқсан-5 қаңтар аралығында Аустралияның Сидней және Перт қалаларында аралас командалық сында United Cup турнирі өтеді. Онда аралас теннис командалары бақ сынайды, деп хабарлайды Halyq Uni.
Қазақстан құрамасы С тобында өнер көрсетеді. Бұл топта Испания және Грекия бар. Құрама спортшылары: Елена Рыбакина, Жібек Құламбаева, Александр Шевченко, Дмитрий Попко және команда капитаны Александр Недовесов.
27 желтоқсанда алғашқы матчта Елена Рыбакина испаниялық Джессика Бузас Манейроға қарсы ойнайды, ал Александр Шевченко Пабло Каррено Бустамен кездеседі.
Рыбакина осы уақытта Брисбенде өткен былтырғы титулын қорғап, WTA рейтингінде 500 ұпай жинауды жоспарлаған еді, бірақ командалық турнирді таңдап отыр.
United Cup турниріне қатысу арманым еді. Теннис негізінен жеке спорт түрі болғандықтан, бізге команда құрамында болуға мүмкіндік бола бермейді. Ал мен үшін команданың қолдауы ерекше сезім сыйлайды. Оның үстіне ел намысын қорғау – аса маңызды, – дейді Елена Рыбакина.
Айта кетсек, бұл жолы Қазақстан United Cup турнирінде екінші рет бақ сынағалы отыр.