Дүниежүзілік көшпенділер ойындарын Түркі әлемінің олимпиадасы ретінде ұйымдастыруға болады. Мұндай пікірді Қырғыз-түрік «Манас» университетінің профессоры Женгиз Буяр айтты, деп хабарлайды Halyq Uni. 

5-ші Дүниежүзілік көшпенділер ойындары Түркі әлемінің ортақ бір іс-шарасы ретінде біз үшін өте маңызды. Алғашқы үш ойын Қырғызстанда өтті, төртінші ойындар Түркия аумағында ұйымдастырылды. Қазақстанның астанасында өтіп жатқан ойындардың да ұйымдастырылуы көңілімізден шығып жатыр. Түркі елдерінің түпкір-түпкірінен келген қонақтарды көріп отырмыз. Ойындардың бағдарламасында спорт, мәдениет және ғылым бөлімі бар», - дейді ол.

Буяр ғалым ретінде түркі әлеміндегі мәдени құндылықтарды анықтау, түркі әлеміне ортақ спорт түрлерін зерттей түсу маңызды екенін айтады.

Мәдени бөлім түркі әлемінде ұмыт қалған мәдени құндылықты қамтыған. Этноауылда қойылған кілем, күмістен жасалған бұйымдар, қыш ыдыстар, құрақ көрпе – мұның бәрі біздің мәдени мұрамыздың бір бөлігі. 5-ші Дүниежүзілік көшпенділер ойындары түрік халықтары мәдениетінің жанданып, келешек ұрпаққа мұра етіп қалдыруға өте үлкен үлес қосады. Бұл бағдарлама бұдан кейін де жалғасын табады деп үміттенемін. Сондай-ақ бұл бағдарламаның спорттық іс-қимылдары Түркі әлемінің олимпиадасы болатындай перспективаға ие, солай істесек те болады, - дейді Женгиз Буяр.

Айтуынша, көшпенділер ойындары спорт сайысымен қатар азаматтардың арасындағы қарым-қатынас үшін маңызды.

Біз қазір бесінші ойындарға қатысып отырмыз. Оныншы, елуінші ойындар болып жалғаса берсін. Әр ойын түркі мемлекетінің бірінде өтіп жатыр. Түркия, Әзербайжан, Өзбекстан, Түркіменстаннан азаматтар Қазақстанға келіп, бауырларын көріп, танысып жатыр. Әлемнің түпкір-түпкірінен келген адамдар да түркі мәдениетімен танысып, түркі халықтарының арасындағы бауырмалдық байланысқа таңқалып жатыр, - дейді ол.

Женгиз Буяр көкпарды өте жақсы көретінін айтып өтті. Бұл ақыл, тактика, күш қажет спорт түрі екенін айтады.

Айта кетейік, 5-ші Дүниежүзілік көшпенділер ойындары 2024 жылдың 8-13 қыркүйегі аралығында Астанада өтіп жатыр.