Ұлыбритания билігі Назарбаевтар отбасы мүшелерінің жылжымайтын мүліктері туралы деректерді жария етті. Ол Лондонда орналасқан және құны 50 миллион доллардан асады. Бұл туралы orda.kz The Times басылымына сілтеме жасап хабарлады.

Отбасының мүлкі оффшорлық компанияларға тіркелген, бірақ Ұлыбритания билігі негізгі иелерін тауып, оны жария етті. Мұндай шешім қабылдау Ресей мен Украина арасында соғыс басталғаннан кейін мүмкін болған. Содан кейін Лондонда жаңа заң енгізіліп, соған сәйкес елдегі жылжымайтын мүлікке ие шетелдік компаниялардың түпкілікті меншік иесін жариялау міндеттелді. Бұған дейін ондай ақпарат құпия болып саналған-ды.

Ұлыбритания Үкіметі тізілімінің жарияланған мәліметтеріне сәйкес, Нұрсұлтан Назарбаевтың үлкен қызы Дариғаның құны 9,3 миллион фунт стерлинг тұратын үйі бар. Ол Лондонның солтүстігінде орналасқан. Сондай-ақ оның Челси аймағында құны 31 миллион фунт стерлинг болатын екі пәтері бар. Барлық мүлік Панамадағы Tropicana Assets Foundation және Villa Magna Foundation оффшорлық компанияларында тіркелген.

Дариғадан басқа, Назарбаевтың күйеу баласы Тимур Құлыбаевтың Ұлыбританияда жылжымайтын мүлкі бар. 2007 жылы ол Саннингхилл саябағындағы Беркширдегі жылжымайтын мүлікті ханзада Эндрюден 2007 жылы 15 миллион фунт стерлингке сатып алған. Сонымен қатар, Құлыбаевтың Гайд-парк маңында 1,5 миллион фунт стерлингтік мүлкі бар.

2020 жылы Қазақстанның экс-президенті отбасының Испания, Франция, Швейцария, АҚШ, Чехия және Ұлыбританияда жалпы құны 785 миллион доллардан кем емес үйлері мен зәулім сарайлары бар екені белгілі болды. Шетелдік пәтерлер мен сарайлардың қожайындары арасында Назарбаевтың інісі – Болат Назарбаев, Болаттың зайыбы Майра Құрманғалиева, күйеу баласы Тимур Құлыбаев, немересінің әйелі Зелин Қатранованың анасы және немересінің бұрынғы әйелінің әкесі Қайрат Боранбаев бар.

Ал бұл отбасының Қазақстанда да жылжымайтын мүлкі мен жері бар екені белгілі. Сондай-ақ бірнеше коммерциялық емес ұйымдар арқылы миллиондаған активтерді басқарады.