Мәжілістің кешегі отырысында депутат Жанарбек Әшімжан құзырлы орындардың назарын ҰҚК шекара қызметіне қарасты Алматы облысындағы шекара бөлімшелеріне аударғысы келетінін айтты. Депутат жақында әр шекара бөлімшесіне жеке-жеке барып, шекарашылардың әлеуметтік-тұрмыстық жағдайымен танысқан.

Оның айтуынша, Қытай және Қырғыз елімен шектесетін аймақтардағы Панфилов ауданындағы Шекара басқармасы, Ұйғыр ауданындағы «Райымбек» шекара заставасы, Кеген ауданындағы «Саты», «Рабат», сондай-ақ, «Қастек», «Жамбыл», «Қарғалы», «Қаскелең», «Алма арасан» шекара бөлімшелерінің әлеуметтік-тұрмыстық жағдайы сын көтермейді.

Арнайы мақсаттағы басқармаларға қарасты нысандардың да дені тозып, күйреудің аз-ақ алдында тұр. Шекарашылар тұратын ғимараттардың бәрі күрделі жөндеуді, көгілдір отынмен қамтуды, жарықтандыру мәселесін реттеуді, биік қоршаулар салуды, бейнебақылау мен электр энергиясы жүйесін жабдықтауды және оқу-жаттығу орталықтарын салуды талап етеді. Ал соңғы 5-6 жылда қауіпсіздік саласына бөлінген қаржы көлемі өте аз.

«Ащы да болса айтайын, «Саты», «Рабат» заставасындағы шекарашылар 90-жылдардың тоқырауында қалып кеткен ескі монша мен есік-терезесі аңғал-саңғал балабақшада тұрып жатыр. Панфилов ауданындағы шекара басқармасы сонау 1892 жылы салынған ғимаратқа орналасқан. Шонжыдағы «Райымбек» заставасының әскерилері тұратын тұрғын-үйлердің төбесінен су ағып, қабырғалары сетінеп, спорт залы, кітапхана, мәжіліс залы күресінге айналудың аз-ақ алдында тұр», - дейді ол.

Депутаттың айтуынша, шекарашылар тұрып жатқан ғимараттардың сапасынан бөлек, шекара басқармалары мен заставалар орналасқан аумақтың қоршаулары да тозған.

Түрлі қару-жарақ сақтайтын стратегиялық нысандар адам бойындай ғана ескі қоршауда тұр. Оны «жаяу адам жапырып, атты адам опырып өтеді», - дейді депутат.

Депутат құрлықтағы және теңіздегі барлық шекара қызметінің материалдық-техникалық базасы мен әлеуметтік нысандарын дереу тексеруді, Алматы облысындағы шекарашылардың әлеуметтік-тұрмыстық жағдайын шұғыл арада шешуді ұсынып отыр.