Жаңа Қазақстан – бұл қоғам мен ұлттық жаңаруы, ал Екінші республика – мемлекеттік модельдің жаңаруы екен
Мемлекет басшысы кеше алматылықтарды Наурыз мейрамымен құттықтағанда өз сөзінде «екінші республика» деген жаңа тіркесті пайдаланды. Осыған байланысты қоғамда «екінші республика» мен «Жаңа Қазақстан» тіркестерінің арасында қандай байланысы бары жайлы сұрақтар туындай бастады.
Мемлекеттік хатшы Ерлан Қарин президенттің «екінші республика құрамыз» деген сөзін түсіндіріп, екі идеологеманың мағынасы бір, тек акценті ғана басқа екенін айтты.
Қаңтар оқиғаларынан кейін біз автоматты түрде Жаңа Қазақстанда өмір сүре бастадық деуге болады. Президент ұлтты қалыптастырудың жаңа мақсатын айқындап берді. Ал Жаңа Қазақстанды бір сәтте құру мүмкін емес. Бұл – терең әрі ұзақ қоғамдық трансформация процесі, - деп жазды Ерлан Қарин.
Тоқаев соңғы жолдауында саяси реформаларын жариялап, билік институттары арасындағы конституциялық балансты өзгертуге мүдделі екенін танытты. Негізгі жаңалығы сол, Қазақстан суперпрезиденттік басқару формасынан мықты парламенті бар президенттік республикаға ауысады.
«Осыған байланысты Конституцияның 30-бабына және 20 заңға өзгеріс енгізіледі. Бұл – ауқымды реформа. Соның арқасында саяси жүйе өзгеріп, халық мемлекетті басқару ісіне көбірек араласады. Бұның барлығы биыл іске асырылады. Осылайша, мемлекетті басқару моделі өзгерген «Екінші республика» болады», - деп түсіндірді Ерлан Қарин.
Мемлекеттік хатшының айтуынша, «Екінші республика» – бұл жақын тұрған мақсат. Себебі президент ұсынған саяси реформаларды биыл іске асыру жоспарланған. Жаңа Қазақстан – бұл қоғам мен ұлттық жаңаруы, ал Екінші республика – мемлекеттік модельдің жаңаруы.