«Қазақстан темір жолы» ҰК» АҚ Қазақстан қор биржасында 50 млрд теңгеге облигация орналастырады. Оны Еуропа қайта құру және даму банкі (ЕҚДБ) қаржыландырады, деп хабарлайды банктің баспасөз қызметі.

«Инвестиция ұлттық теміржол операторына өз балансын қайта құруға және дағдарысқа қарсы шаралар кешенін жүзеге асыруға, соның ішінде пандемия салдары мен жалғасып жатқан геосаяси күйзеліспен күресу үшін жүк тасымалдау қызметін қайта ұйымдастыруға көмектеседі», делінген хабарламада.

Бұл ЕҚДБ-ның Қазақстандағы ұлттық валютадағы облигацияларға салған алғашқы инвестициясы және тәуекелсіз TONIA мөлшерлемесімен байланысты купоны бар жергілікті компанияның облигациялардың бірінші шығарылымы. TONIA Composite Index (TCI) көмегімен есептелетін TONIA тәуекелсіз мөлшерлемесін Қазақстан Ұлттық Банкі, ЕҚДБ және елдің жетекші қаржы институттары бірлесіп әзірледі және несиелік құралдар үшін эталондық мөлшерлеме ретінде пайдаланылады.

1720-дан астам локомотив пен 46 200 жүк вагоны бар 16 000 шақырымдық теміржол желісіне иелік ететін және оны басқаратын ҚТЖ бұл қаражатты Орта дәліз, яғни Транскаспий халықаралық көлік жолы (ТХКЖ) бойындағы негізгі инфрақұрылымдарды жаңартуға пайдаланбақ. Бұл жол Еуропа мен Азияны байланыстыратын Ресейді айналып өтетін жол.

«Соңғы жылдары Қытай мен Еуроодақ (ЕО) арасындағы жүк тасымалының 95 пайызға жуығы Қазақстан, Ресей және Беларусь арқылы өтетін Солтүстік дәліз арқылы жүзеге асырылатын. Халықаралық тасымалдаушылар Ресей арқылы өтудің балама жолдарын іздестіруде, Қазақстанды Каспий теңізі арқылы Әзірбайжан, Грузия және Түркиямен байланыстыратын Орта дәліз бойынша тасымалдауға сұраныс айтарлықтай өсті. Оның дамуы аймақтық сауданың тұрақтылығы үшін аса маңызды», делінген хабарламада.

«ЕҚДБ «Қазақстан темір жолы» ҰК» АҚ облигацияларын шығаруға инвестициялау арқылы отандық ірі компанияның тұрақтылығын арттырады. Бұл сондай-ақ аймақтық және халықаралық байланыс пен сауда қауіпсіздігін жақсартады, өйткені Орта дәліз Қытай-Еуропа теміржол жүк тасымалы үшін бірнеше өміршең баламалардың бірін ұсынады», дейді ЕҚДБ Қазақстандағы басшысы Хусейн Ожан.