Ресейлік олигархтар мен мекемелер Еуроодақ санкцияларының салдарынан құны 12,5 миллиард еуродан асатын қымбат яхта, тікұшақ, жылжымайтын мүлік сынды басқа да активтерінен айырылды.

Ресейлік олигархтардың бұғатталған активтерінің көлемі осы жылғы сәуір айынан бастап 6,7 миллиард еуродан 12,5 миллиард еуроға дейін, яғни екі есеге жуық артты, - деп хабарлады Еурокомиссияның әділет жөніндегі ресми өкілі Кристиан Виганд Die Welt басылымына берген жауабында.

Ол бұғатталған активтердің күрт өсуін соңғы апталарда, әсіресе, Германияда ресейлік олигархтарға тиесілі көптеген нысандардың анықталып, бұғатталуымен байланыстырып отыр.