Сәйкесінше, меймандар орналасатын орындардың табысы да көбейді
Астанада Қазақстан туризмінің болашағы талқыланды, деп хабарлайды Halyq Uni.
Елордада «Қазақстан туризмінің болашағы: стратегиялар, сын-қатерлер және шешімдер» атты стратегиялық сессия өтті. Қатысушылар саладағы негізгі сын-қатерлерді талқылап, 2024 жылдың жетістіктерін қорытындылады. Сондай-ақ, саланың болашақтағы даму жоспарын айқындады, деп мәлімдеді Туризм және спорт министрлігі.
Сессияға Үкімет аппараты мен Сыртқы істер министрлігі секілді мемлекеттік құрылым өкілдері, Kazakh Tourism және Kazakh Invest ұлттық компанияларының басшылары, Қазақстан туристік индустриясының жетекші халықаралық сарапшылары мен өкілдері қатысты. Халықаралық спикерлер арасында Marriott International және Gratiya Advisory компанияларының өкілдері сөз сөйлеп, әлемдік тәжірибелерін ортаға салды.
Іс-шара барысында саланың 2024 жылғы жұмысы қорытындыланды. Мәселен, биыл шетелдік туристер ағыны 11,5 миллион адамға жетіп, 2023 жылмен салыстырғанда екі есе артты. Орналастыру орындарының табысы 27%-ға артып, 224 миллиард теңгеге жетті. Бұған қоса, Қазақстанның әлемдік туристік нарықтағы имиджін нығайтуға ықпал еткен «Қазақстан бойынша гид» атты ауқымды конкурс пен қазақстандық белгілі тұлғалар қатысқан халықаралық жарнамалық науқандар сынды жобалар іске асырылды.
Жыл басынан бастап жеке инвесторлар мен кәсіпкерлік субъектілеріне мемлекеттік қолдау шараларының тиімділігін арттыруға назар аудару қажет. Сонымен қатар, туристік салаға тікелей шетелдік инвесторларды тарту жөніндегі жұмыстарды жандандыру керек. Бұдан бөлек, курорттық аймақтардың инженерлік-инфрақұрылымдық қамтамасыз етілуін жақсарту үшін, соның ішінде жолдар, электрмен қамтамасыз ету және су құбыры жүйелері бойынша қажетті нормативтік құқықтық актілер мен заңнамаға өзгерістер енгізу маңызды, – деді Туризм және спорт министрінің орынбасары Ержан Еркінбаев.
Жиында мемлекеттік қолдау механизмдерін жетілдіруге, саланың инвестициялық тартымдылығын арттыруға және Kazakh Tourism-нің стратегиялық рөліне ерекше назар аударылды. Сессия қорытындысы бойынша қатысушылар Қазақстандағы туризмді дамыту үшін нақты қадамдарды айқындап, Kazakh Tourism функцияларын жетілдіру, жаңа қаржыландыру тетіктерін енгізу және еліміздің халықаралық туристік алаңдағы орнын нығайту мәселелерін қарастырды.