Қарағанды облысында биыл ауыл шаруашылығы тауарын өндірушілерді мемлекеттік қолдауға 23,5 млрд теңге бөлінген. Бұл субсидиялау қажеттілігін толығымен жабады. Соңғы 3 жылда фермерлер алдында қарыздар мен өтпелі өтінімдер жоқ, деп хабарлайды Halyq Uni.

Ауыл шаруашылығы тауарын өндірушілер мемлекет басшысының тапсырмаларын орындау үшін жүргізіліп жатқан аграрлық саланы дамыту жөніндегі жұмыстың тиімділігін атап өтті.

Соңғы жылдары біздің аграрлық қауымдастық айтарлықтай өзгерістерге ұшырап отыр. Бұл ретте мемлекеттің рөлі зор. Қолдау шаралары бұрын-соңды болмаған. Тек жақсы жұмыс істеу керек! Биыл біз егін егу, өңдеу және жинау процестерін жеделдете алдық. Нәтиже көп күттірмеді: жиналған астық көлемін едәуір арттыра отырып, өнімділік бойынша рекордтық көрсеткіштерге қол жеткіздік, - деді алдыңғы қатарлы шаруашылықтардың бірі «Шахтерское» ЖШС-нің директоры Георгий Прокоп.

Оның айтуынша, бірыңғай уақыт белдеуіне көшу де өз артықшылықтарын берген. Себебі механизаторлар далаға ертерек шыға алады. Бұл шаруаларға күндізгі уақытты тиімді пайдалануға және жақсы жағдайда жұмыс істеуге мүмкіндік береді. Тиісінше, бұл еңбек өнімділігіне әсер етеді.

Айта кетсек, биыл қарағандылық аграршылар соңғы 13 жылда дәнді дақылдар мен картоптан рекордтық өнім алған. Ал жалпы ауыл шаруашылығы өнімдерін өндіру бойынша бұл өңір еліміз бойынша 7-орында тұр.

Мал шаруашылығында да оң динамика байқалады. Ет және сүт өнімдерін өндіру тұрақты өсіп отыр.

Енді біз таңғы 4-5-тен бастап жұмыс уақытын тиімдірек бөле аламыз. Бұл әсіресе малды жаюға, күтуге және қатаң белгіленген уақытта жасалуы керек ветеринарлық процедураларға қатысты өте маңызды. Бұл өнімділікті арттыруға көмектеседі. Сонымен қатар, энергия мен күш жұмсау айтарлықтай төмендеді. Өйткені таңертеңгі уақыт әлдеқайда салқын. Біз жануарлармен жұмыс істей отырып, олар үшін әрқашан қолайлы жағдай құруға тырысамыз, - деп атап өтті «Шанс» шаруа қожалығының басшысы, Қазақстан фермерлер одағы Қарағанды филиалының төрағасы Игорь Жабяк.

АӨК-ке инвестициялар өсті. Биыл 13,5 млрд теңгеге 18 жоба іске асырылған. Тағы 12 жоба желтоқсан айының соңына дейін іске қосылады деп жоспарланып отыр.