Алматы облысында жылына 3,5 мың тонна өнім өндіру қуатымен ет комбинаты салынып жатыр, деп хабарлайды Halyq Uni.

Ауыл шаруашылығы министрлігінің мәліметінше, Кеген ауданының Тасашы ауылында «Кеген МясоПром» ет өңдеу зауытын салу бойынша инвестициялық жоба жүзеге асып жатыр. Жоба құны – 2,5 млрд теңге. Зауыт ірі және ұсақ малдың, сондай-ақ жылқы етін өңдейді, Алматы облысының тұрғындарын жоғары сапалы ет, шұжық және консервіленген өнімдермен қамтамасыз етеді.

Жоба 2024 жылдың желтоқсанында пайдалануға беріледі. Зауыттың өндірістік қуаты бір ауысымда 40 бас ірі қара, 150 бас ұсақ мал және 10 жылқы союға есептелген. Шұжық цехының қуаты бір ауысымда 1,5 тонна шұжық өнімдерін, консерві зауытының қуаты 1 000 банка өнім шығаруға есептелген. Толық қуатына шыққаннан кейін ет комбинаты жылына 3 мың тоннаға дейін ет өңдейді және 331,5 тонна шұжық өнімдерін, 66 тонна ет консервісін шығарады, – деп қосты ведомство.

Кеген және Райымбек аудандарының тұрғындарынан мал нарықтық бағамен сатып алынады. Ет комбинатын өз шикізатымен үздіксіз қамтамасыз ету үшін өздігінен азықтандыру алаңдарын ашу жоспарланып отыр. Жоба аймақтағы мал шаруашылығы саласының дамуын ынталандыруға және сапалы әрі арзан ет өнімдеріне қол жетімділікті қамтамасыз ету арқылы тұрғындардың әлеуметтік-экономикалық жағдайын айтарлықтай жақсартуға бағытталған.