Қазақстанда IT-мамандарға арналған Digital Nomad Visa (DNV) іске қосылды, деп хабарлайды Halyq Uni.

Цифрлық даму министрлігі халықаралық мамандарды тарту және еліміздің цифрлық экономикасын дамытуға бағытталған DNV бағдарламасының іске қосылғаны туралы мәлімдеді. Бұл виза әлемнің түкпір-түкпіріндегі мамандарға Қазақстанда заманауи цифрлық қызметтер мен жоғары деңгейлі жайлылықты пайдалана отырып, өмір сүру әрі жұмыс істеуге мүмкіндік береді.

Digital Nomad Visa IT-мамандарға арналған, елімізді қашықтан жұмыс істеуге ыңғайлы хаб ретінде ұсынады. Бағдарлама жоғары жылдамдықты интернетке қолжетімділік, озық цифрлық қызметтер және бизнесті жүргізудің жеңілдігі жағдайында маңызды кәсіби мамандарды тартуға бағытталған.

DNV артықшылықтары:

• Икемді визалық режим: визаны беру мен ұзарту рәсімдерінің жеңілдетілуі.
• 5G әрі спутниктік байланысқа қолжетімділік: Қазақстан аумағында тұрақты байланыс қамтамасыз етілген.
• Жергілікті мәдениетпен интеграция: бейімделуге, тұрғын үй іздеуге және кәсіби байланыстар орнатуға көмек.
• Мемлекеттік қолдау: бизнесті жеңілдету мен инновациялық жобаларға қатысу мүмкіндігі.

«Digital Nomad Visa – елімізді цифрлық көшпенділер үшін халықаралық орталыққа айналдыруға бағытталған маңызды қадам. Бағдарлама жұмыс істеуге ыңғайлы жағдайлар әрі жоғары өмір сүру деңгейін қамтамасыз етеді. Бұл инновациялық экожүйелерді дамытуға және әлемнің түкпір-түкпіріндегі мамандармен тәжірибе алмасуға ықпал етеді», – деді цифрлық даму министрі Жаслан Мәдиев.

DNV бағдарламасы қазірдің өзінде қолжетімді, әрі Қазақстанда жұмыс істеу мен өмір сүруге бірегей мүмкіндіктер береді.