Жұмыс жақын арада аяқталады
Еліміздің 3 облысында ирригация және дренаж жүйелерін ауқымды реконструкциялау жұмысы аяқталуға жақын қалды, деп хабарлайды Halyq Uni.
Алматы, Жамбыл және Қызылорда облыстарында ирригация және дренаж жүйелерін (ИДЖ) кешенді реконструкциялау жұмысы аяқталуға жақын қалды. Аталған жүйелер егіс алқаптарына су беріп, жерасты суларының деңгейін реттейді және топырақтың тұздануымен күреседі, деп мәлімдеді Су ресурстары және ирригация министрлігі.
Алматы облысының Еңбекшіқазақ ауданында ИДЖ қайта жаңғырту жұмыстары жүріп жатыр. Оның көмегімен Үлкен Алматы каналынан 5 мың гектар жер суарылады. Бүгінгі таңда ұзындығы 58,3 шақырым болатын арналар 90%-ға қайта жаңартылды. Су беруді реттейтін 478 гидротехникалық құрылыстың 372-сі жөнделді, – деп қосты ведомство.
Жамбыл облысының Шу ауданында Оң жағалау магистральдық каналдан 5 мың гектар жерге су беретін ИДЖ реконструкцияланып жатыр. Бүгінгі таңда ұзындығы 69,6 шақырым канал 83%-ға, ұзындығы 25,3 шақырым болатын дренаж жүйесі 69%-ға, ұңғымалар орнату жұмыстары 87%-ға аяқталды.
Қызылорда облысының Жалағаш ауданында 4 ауылдық округте 15,1 мың гектар егіс алқабын Сол жағалау магистральдық каналынан сумен қамтамасыз ететін ИДЖ-ді қайта жаңғырту бойынша «Қызылорда-1» жобасы іске асырылып жатыр. Бүгінгі таңда ұзындығы 1427 шақырым каналдың 95%-ы қайта жаңартылды, 14 533 гидротехникалық құрылыс жөнделді, ал 328 шақырым дренаж жүйесін реконструкциялау 99%-ға аяқталды.
Барлық үш жобаны осы жылдың соңына дейін аяқтау жоспарланып отыр, – деп толықтырды министрлік.
«Бұл жұмыстың барлығы Дүниежүзілік банкпен бірге жүзеге асырылып жатқан еліміздің оңтүстігіндегі суару және дренаждық жүйелерді жетілдіру жобасының екінші кезеңінің бөлігі болып саналады. Сондай-ақ, Түркістан облысында екі ИДЖ-ді реконструкциялау аяқталуға жақын. Осыған дейін Жамбыл облысында екі жоба аяқталды. Орындалған жұмыстар каналдардың тиімділігін 25%-ға арттыруға, су шығынын азайтуға, сондай-ақ топырақ жағдайын және ауыл шаруашылығын сумен қамтамасыз ету көрсеткішін жақсартуға мүмкіндік берді», - деді Су ресурстары және ирригация вице-министрі Ерболат Ибрайханов.