Биыл фермерлер жарты миллион тонна күріш жинамақ
Қызылорда облысында күріш жинау науқаны басталды, деп хабарлайды Halyq Uni.
Ауыл шаруашылығы министрі Айдарбек Сапаров егін жинау науқанын бастау рәсіміне қатысты. Іс-шара Қызылорда облысындағы республикалық семинар-кеңес аясында өтті. Сапаров өңірдің күріш өндірісінде көшбасшы екенін атап өтті, деп мәлімдеді Ауыл шаруашылығы министрлігі.
Биыл Үкімет егіс пен егін жинау науқанын қаржылық және материалдық-техникалық қамтамасыз етудің барлық мәселесін шешті. Алғаш рет көктемгі егіс пен егін жинау жұмыстарына жеңілдікпен кредит беру көлемі 580 млрд теңгені құрап, жылдық «таза» 5%-бен берілді. 334 млрд теңге игерілді.
Президенттің тапсырмасы бойынша биыл тыңайтқыштар енгізу бойынша үлкен жұмыс жүргізілді. Мәселен, егер өткен жыл ішінде 679 мың тонна енгізілсе, қазіргі уақытта ғана 1,2 млн тонна сатып алынды. Бұл ретте, Қызылорда облысы тыңайтқыштар енгізу бойынша көшбасшы болып саналады. Жоспар бойынша 63,3 мың тоннаға 100% үлес қосылды, - деген министр аграршыларға егін жинау науқанының сәтті аяқталуын тіледі.
Биыл өңір фермерлері жарты миллион тоннадан астам күріш жинауды жоспарлап отыр. Іс-шара барысында өңірлік ауыл шаруашылығы кооперативтері және өнім өндірушілер арасында меморандумдарға қол қойылды.
Қол жеткізілген уағдаластықтарға сәйкес, өңірлердің тұрақтандыру қорларына 1000 тоннадан астам күріш пен тұз жеткізіледі. Бұл өнімдер ішкі нарықты қамтиды және күріш әрі тұз бағасының тұрақтануын қамтамасыз етеді.