Бір шақырым жолды жөндеу үшін 100 млн теңге керек – министр
Жолды күтіп ұстау құны – 2 млн теңге
![](https://halyq-uni.kz/cache/imagine/1200/uploads/news/2024/06/11/66688e7424aff443752553.jpg)
Бүгінде елімізде бір шақырым жолды жөндеу үшін 100 млн теңге керек. Бұл туралы Көлік министрі Марат Қарабаев айтты, деп хабарлады Halyq Uni тілшісі.
Оның айтуынша, жолдың бағасы көптеген факторға байланысты.
Жолдың бір шаршы шақырымының құны ауа-райы мен материалға байланысты. Мысалы, оңтүстікте асфальттың бір түрі, солтүстікте басқа түрі төселеді. Сондықтан (жолдың бір шаршы шақырымының құны) көптеген факторға байланысты, - деді Марат Қарабаев министрлікте өткен баспасөз мәслихатында.
Министр жолды орташа жөндеу әдеттегі жөндеуден ерекшеленетінін атап өтті.
Жалпы бір шақырымның құны 100 млн теңге болады. Орташа жөндеу шамамен 20-50%-ға қымбатқа түседі. Мұнда жолдың негізі ұсақталып, қайта өңделеді, онда тұрақтандырғыш (стабилизатор) қойылады. Осылайша, ол жолдың негізіне айналады. Бұл жолдың беріктігін нығайтады. Орташа жөндеудің жарамдылық мерзімі – 5 жыл. Бұл барлық норманы сақтаған жағдайда. Бір шақырым жолды күтіп ұстаудың құны – шамамен 2 млн теңге, - деді ведомство басшысы.
Сондай-ақ Марат Қарабаевтың сөзін орынбасары толықтырды.
«Орташа жөндеу кезінде бір шақырым жолдың құны 120 млн теңгеден 150 млн теңгеге дейін болады. Мұнда асфальт жолдың екі қабатына төселеді, жалпы 15 см асфальт қарастырылған», - деді көлік вице-министрі Сәтжан Аблалиев.
Бұған дейін министр сапасы сын көтермейтін жолдар қай өңірде көп екенін айтқан еді.