ЕАЭО елдері арасында Қазақстан қаңтарда етті ең аз өндірген
Ал Ресейде жұмыртқа өндірісі төмен
![](https://halyq-uni.kz/cache/imagine/1200/uploads/news/2024/03/12/65efeec15ad25579979634.jpeg)
Қазақстан биылғы қаңтарда мал мен құс етін өндіруді қысқартқан. Бұл туралы Еуразиялық экономикалық комиссия хабарлады.
Жыл басындағы өндірілген 140 мың тонна ет 2023 жылғы қаңтардағы көрсеткіштің небәрі 98,9%-ын қамтиды және бұл көрсеткіш Еуразиялық экономикалық одақ елдеріндегі ең төменгі көрсеткіш саналады.
2024 жылдың қаңтарында Еуразиялық экономикалық одақта барлық санаттағы шаруа қожалықтарында ауыл шаруашылығы өнімі 2023 жылдың қаңтарымен салыстырғанда 0,5% өсті, - деп отыр комиссиядағылар.
ЕАЭК-тегілер Беларусьте, Қырғызстанда және Қазақстанда өсім бар екенін, ал Ресейде төмендеу байқалғанын да алға тартты.
Сонымен қатар, 2023 жылдың қаңтарымен салыстырғанда союға арналған мал мен құс етін өндіру (тірі салмақта) – 1%, сүт – 3,2%, жұмыртқа өндіру 0,9% төмендеген. Бұл ретте союға арналған мал мен құс етін (тірі салмақта) өндіру Беларусьте (104%), Ресейде (100,9%) және Қырғызстанда (100,7%) өсіп, Қазақстанда төмендеп отыр.
ЕАЭО-ның барлық мемлекеттерінде (Армения деректерін қоспағанда) сүт өндірісі артқан. Жұмыртқа өндірісі Қырғызстан, Беларусь және Қазақстанда қарқын алса, Ресейде тағы төмен дәрежеде.