Әкімдік мәселені біртіндеп шешпек
Маңғыстау облысының әкімі өңірге азық-түліктің 84%-ы сырттан жеткізілетінін айтты, деп хабарлады Halyq Uni тілшісі.
Оның айтуынша, биыл 10 айда облыста агроөнеркәсіп кешені өсім көрсеткен.
2023 жылы жалпы құны 1 млрд теңге болатын 4 жоба іске асты. Жаңа 80 жұмыс орны ашылды. Оның ішінде азық-түлік сақтайтын қоймалар, жылыжай кешені, ет өңдеу комбинаты және ет өнімдерін консервілеу сынды жобалар іске қосылды. Биыл Маңғыстау облысында жергілікті кәсіпкерлер тәжірибе ретінде зәйтүн ағаштарын егуді қолға алып жатыр. Қазір 2 мың түп зәйтүн ағашы егілді. Сондай-ақ Арыста (Түркістан облысы) және Жаркентте (Жетісу облысы) да зәйтүн ағаштары егілді. Егер осы жоба оң нәтиже берсе, кәсіпкерлер 10 мың гектарға дейін зәйтүн ағашын егіп, оның майын алуды жоспарлап отыр, - деді Нұрлан Ноғаев ОҚК-да өткен баспасөз мәслихатында.
Облыс әкімі бұл жобаларды іске асыру маңызды екенін атап өтті.
«2024 жылға біз 5 жобаны жоспарлап отырмыз. Оның ішінде 4 жылыжай құрылысы бар. Себебі біздегі азық-түліктің 84%-ы сырттан жеткізіледі. Тәуелділікті азайту үшін жылыжайларды іске қосуды жоспарлап отырмыз. Сонымен қатар азық-түлік сақтайтын қоймаларды салу мәселесі бар. Бұл жобалардың құны – 2,2 млрд теңге. Қазір мал азығы 99,8-99,9%-ға қамтамасыз етілді. Құдайға шүкір, биыл ауа райы қолайлы, жаңбырлы болып, шөп шүйгін шықты. Сондықтан қазір малымыз да күйлі», - деді ол.
Нұрлан Ноғаев агроөнеркәсіп кешенін қолдауға барлығы 2,9 млрд қаражат бөлінгенін атап өтті.
«Оның ішінде 1,7 млрд теңге мал шаруашылығын дамытуға бөлінді. Жалпы 730 ауыл шаруашылығы субъектісіне мал басын көбейтуге 1,5 млрд теңге субсидия төленді. Халықтың әл-ауқатын арттыруға құны 1,2 млрд теңге болатын «Ауыл аманаты» бағдарламасы іске асып жатыр. Ол өзінің нәтижесін көрсетуде. Қазір барлығы құны 1 млрд 200 млн теңге болатын 165 жоба (оның ішінде мал шаруашылығына – 111 жоба, өсімдік шаруашылығына – 6, басқа жобаларға – 48) мақұлданды. Осы жобаларды іске асыруды жоспарлап отырмыз», - деді облыс әкімі.