Түркістанда бизнес және туризм өкілдерінің қатысуымен TIF’23 – «Түркістан: туризм, инвестиция, экономика» халықаралық форумында ауыл шаруашылығы, жеңіл өнеркәсіп, экспорт, логистика және IT-білім салалары талқыланып жатыр.

Халықаралық форум аясында Түркістан облысында ауқымды жиынға қатысып жатқан Қазақстан, Түркия, Қырғызстан, Өзбекстан, Әзербайжан және Қытай, Ресейдің компанияларымен бірнеше бағытта 20-ға жуық меморандумға қол қойылды.

Түркістан облысы әкімдігінің хабалауынша, меморандумға қол қойылып, келісімдер жасалды:

• Сауран ауданында тоңазытқыш қондырғылар өндірісін кеңейту;
• Созақ ауданында фосфатты тау жыныстары кендерін өңдеу зауытының құрылысы;
• «Шардара» экспорттық агроөнеркәсіптік кластерін құру;
• Мақтаарал ауданында тоқыма кластерін құру және Келес ауданында индустриалды парк құрылысы;
• Сайрам ауданында қуаттылығы 1000 МВт болатын икемді генерациялау режимі бар аралас циклді газ станциясының негізінде электр станциясын салу;
• Түсті рудаларды және металлургия өндірісінің өнеркәсіп қалдықтарын қайта өңдеу бойынша Кентау байыту комбинатын іске қосу;
• Жетісай ауданында тоқыма фабрикасын құру; Бәйдібек ауданында тауық жұмыртқасын өндіретін құс фабрикасын құру;
• дымқыл майлықтар мен балалар жөргектерін шығару бағытында қолданыстағы желіні кеңейту;
• металл конструкцияларын шығаратын зауыт құрылысы.

Іс-шара мақсаты — экономикалық өсуді ынталандыру, инфрақұрылымды дамыту, жаңа жұмыс орындарын құру, технологиялық жаңару және жергілікті бизнестің бәсекеге қабілеттілігін арттыру мақсатында өңірге шетелдік инвестицияларды тартуға жәрдемдесу.

Сондай-ақ форум қолайлы инвестициялық орта құру, тәжірибе алмасу және өңірдің орнықты әлеуметтік-экономикалық дамуын ынталандыру үшін бірлескен шешімдер іздеу мақсатында инвесторлар, бизнес-қоғамдастық өкілдері мен мемлекеттік құрылымдар арасында әріптестік қатынастар орнатуға бағытталған.

Ауқымды жиынға Қазақстан, Түркия, Қырғызстан, Өзбекстан, Әзірбайжан, Ресей елдерінің беделді саясаткерлері, ықпалды кәсіпкерлері, сала көшбасшылары мен сарапшылары, инноваторлары қатысып жатыр.