Биыл қыркүйектен бастап Petrosun ЖШС (42%-ы «ҚазМұнайГаз» ҰК АҚ-на тиесілі) Қазақстанның өңірлеріне әлеуметтік-өндірістік нысандар мен мекемелердің қажеттіліктері үшін 22 мың 420 тонна әлеуметтік мазут жеткізген, деп хабарлады Halyq Uni тілшісі.

Отынмен қамтамасыз ету деңгейі 42% болды. Бұл ретте Қазақстанның үш МӨЗ-інде тағы 9 мың 140 тонна әлеуметтік мазут жөнелтетіні мәлімделген.

Petrosun отын жеткізілімін Энергетика министрлігі бекіткен «2023-2024 жылдары күзгі-қысқы кезеңде әлеуметтік-өндірістік объектілер мен мекемелерге мазутты жеткізу үшін облыстар мен Нұр-Сұлтан, Алматы және Шымкент қалаларын мұнай және мұнай өнімдерінің негізгі ресурстарын ұстаушыларға бекіту кестесі» аясында және жергілікті атқарушы органдардың атаулы үлестіруіне сәйкес іске асырып жатыр.

Өткен айда Petrosun кестеде ескерілген қыркүйек айындағы көлемі шеңберінде мазуттың 94%-ға жеткізілуін қамтамасыз етті. Қазанда айлық көлемнің 25%-ы жеткізілген. Міндеттемелер өңірлік операторлардан төлем түскенге қарай толығымен орындалатын болады.

Әлеуметтік мазутты алған алғашқы өңірлердің қатарында Қарағанды, Ақмола, Жамбыл облыстары мен Алматы қаласы болды. Жеткізілген отын көлемі – 12 мың 180 тонна.

Бүгінде мазутты өңірлерге жеткізу жалғасып жатыр. Кесте бойынша қазанда жоспарланған 30 мың 430 тонна көлемнің 10 мың 240 тоннасы жеткізілді.

Осы жылдың қарашасынан бастап 2024 жылдың ақпанына дейін Petrosun компаниясы кестеде тағайындалған өңірлерге, атап айтқанда, Атырау (2 мың тонна), Қарағанды (25 мың 647 тонна), Ұлытау (4 мың 761 тонна), Павлодар (7 мың 418 тонна), Шығыс Қазақстан (4 мың 619 тонна), Абай (540 тонна), Солтүстік Қазақстан (3 мың 869 тонна), Жамбыл (15 мың 28 тонна), Жетісу (6 мың 876 тонна), Түркістан (1 мың 700 тонна), Қызылорда (6 мың 85 тонна), Маңғыстау (2 мың 700 тонна) және Алматы облыстарына (614 тонна), сондай-ақ Астана (1 мың тонна), Алматы (10 мың 592 тонна), Шымкент (10 мың тонна) және Байқоңыр (4 мың 800 тонна) қалаларына отын жеткізілімін қамтамасыз етуді көздеп отыр. Жалпы көлемі 108 мың 249 тонна болады.

Басқа ресурс ұстаушыларына қарағанда әлеуметтік міндеттемелердің айтарлықтай бөлігі Petrosun-ға тиесілі екендігін атап өткен жөн. Бұл кесте бойынша мазут жеткізілімі – жалпы көлемінің 161 мың 892 тоннаға сәйкес келетін 60%-ы дерлік.

Petrosun компаниясы кесте аясында мемлекет өзіне жүктеген әлеуметтік міндеттемелерді келісілген мерзімде толық көлемде орындауды жалғастырып жатыр.

Анықтама үшін: Petrosun ЖШС 2012 жылдың қаңтарында құрылған. Компания – «ҚазМұнайГаз» Ұлттық компаниясы» АҚ-тың және «Қазақстандағы ҚҰМК Интернационал» ЖШС-нің еншілес ұйымы. Қызметінің негізгі түрлері мұнайды сатып алуды және өңдеуді, мұнай өнімдерін ішкі және сыртқы нарықтарға өткізуді қамтиды.

Әлеуметтік мазут – бұл әлеуметтік-өндірістік нысандар мен мекемелердің қажеттіліктері үшін қолданылатын сұйық отынның бір түрі, соның ішінде:

• балабақшалар, мектептер, ауруханалар;
• қарттар үйлері, интернаттар;
• кедейлер мен мұқтаждарға көмек көрсететін әлеуметтік мекемелер;
• коммуналдық шаруашылық кәсіпорындары.

Әлеуметтік мазутты мемлекет жеңілдікті бағамен жеткізеді. Бұл әлеуметтік-өндірістік объектілер мен мекемелерге жылыту және ыстық сумен жабдықтау шығындарын азайтуға мүмкіндік береді.

Қазақстанда әлеуметтік мазутты жеткізу ҚР Энергетика министрлігі бекіткен «күзгі-қысқы кезеңде әлеуметтік-өндірістік объектілер мен мекемелерге мазутты жеткізу бойынша мұнай мен мұнай өнімдерінің негізгі ресурс ұстаушыларына облыстар мен Астана, Алматы және Шымкент қалаларын бекіту кестесі» шеңберінде іске асырылады.