Қазақстан мен АҚШ сыбайлас жемқорлыққа қарсы ынтымақтастықты нығайтуда.

Бүгін сыбайлас жемқорлыққа қарсы іс-қимыл агенттігінің төрағасы Олжас Бектенов пен АҚШ-тың Қазақстандағы елшілігінің уақытша сенімді өкілі Джуди Куон арасында кездесу өтті. Тараптар елімізде жүргізіліп жатқан сыбайлас жемқорлыққа қарсы реформаларды және АҚШ-тың сыбайлас жемқорлыққа қарсы іс-қимыл мәселелеріне көмек көрсету бағдарламаларын талқылады.

Агенттік басшысы 2022-2026 жылдарға арналған сыбайлас жемқорлыққа қарсы саясат тұжырымдамасында белгіленген басымдықтарға егжей-тегжей тоқталды. Өз кезегінде АҚШ дипломаты агенттіктің ашықтығын атап өтіп, ынтымақтастықты күшейтуге дайын екенін білдірді.

Тараптар мемлекеттік сатып алулардағы сыбайлас жемқорлықты анықтау үшін жасанды интеллект жүйелерін әзірлеу және сыбайлас жемқорлыққа қарсы жаңа тетіктер даярлау мәселелерін талқылады, – дейді антикор.

Өткен жылы қабылданған сыбайлас жемқорлыққа қарсы күресті АҚШ-тың ұлттық қауіпсіздігі мен сыбайлас жемқорлыққа қарсы күрес стратегиясының негізгі мүдделерінің бірі деп тану туралы меморандумды ескеріп, америкалық тарап Қазақстандағы осы бағыттағы реформаларға жәрдемдесуге дайын екенін білдірді.

Кездесу соңында тараптар екіжақты ынтымақтастықты одан әрі нығайтуға келісті. Бұл жұмыстың маңызды құрамдас бөлігі биылғы мамырдан бастап агенттік қызметкерлерін оқытуды қамтитын екі жылдық жобаны іске асыру болады.