Ақтөбеде екі оқушыны қағып, қашып кеткен көлік жүргізушіге іздеу жарияланды. Ақ түсті көліктің иесі жолдан өтіп бара жатқан балаларды қағып өткенімен қоймай, оларды сол жерге тастап кеткен.

Айта кетсек, 8-9 жастағы ағайындылар жаттығудан үйге қайтып келе жатқан. Абырой болғанда, екеуі де аман. Бірақ басы, кеудесі мен аяғы жарақаттанған. Олар жедел-жәрдеммен ауруханаға жеткізілді.

Жағдайына байланысты екеуін реанимацияға жатқыздық. Толығымен тексерілді. Рентген, КТ жасалды. Мамандар қарады. Жалпы жағдайы тұрақты. Нашарлаған жоқ, - деді Ана мен бала денсаулығын қорғау орталығы бас дәрігерінің орынбасары Сағидолла Досмағамбетов.

Ал полицейлер қазір жауапсыз жүргізушіні іздестіріп жатыр. Оқиғаға қатысты қылмыстық іс қозғалған.

«Дерек бойынша ҚР ҚК-нің 345-бабы 2-бөлігі бойынша қылмыстық іс қозғалды. Тергеу амалдары жүргізіліп жатыр. Сонымен қатар, автокөліктің жүргізушісін анықтауға бағытталған іздестіру жұмыстары басталды», - деді облыстық ПД баспасөз қызметінің жетекшісі Ерболат Сарқұлов.