Оған екі бап бойынша айып тағылып отыр
Бүгін Астанадағы Байқоңыр аудандық сотында экс-президент Нұрсұлтан Назарбаевтың немере інісі Қайрат Сатыбалдыұлына қатысты қылмыстық іс бойынша сот отырысы басталды. Сот процессі ашық - онлайн режимде өтіп жатыр, деп хабарлайды Halyq Uni тілшісі.
Қайрат Сатыбалды отырысқа қорғаушысымен бірге ЕЦ166/1 мекемесінен Zoom конференциясы арқылы қосылды.
Оған Қылмыстық кодекстің «Алдау немесе сенімге қиянат жасау жолымен мүліктік залал келтіру», «Сеніп тапсырылған бөтен мүлікті иемдену немесе талан-таражға салу» баптары бойынша айып тағылып отыр.
Сот отырысы басталмас бұрын Қайрат Сатыбалды отбасы мүшелерімен сөйлесті. Балаларымен сөйлесіп, жағдайын сұрады. Сосын ұлына:
Самат ағаңның қасында бол әрқашан. Бәрін істе, онымен кеңес, жарай ма? – деді Қайрат Сатыбалды ұлына.
Айта кетейік, 2022 жылдың 13 наурызында сыбайлас жемқорлыққа қарсы қызмет Қайрат Сатыбалдының ұсталғанын хабарлады. Ол «Қазақтелеком» АҚ-ның қаражатын аса ірі көлемде жымқырды деген күдікке ілінген.
Қайрат Сатыбалды – тұңғыш президент Нұрсұлтан Назарбаевтың немере інісі.
Қайрат Сатыбалдының бұрынғы әйелі Гүлмира Сатыбалды да қамауға алынды. Ол Универсиада-2017 нысандарын жөндеуге бөлінген ақшаны ұрлады деп айыпталды.