Рейстерді кешіктіру кезінде жолаушылардың құқықтарын бұзғаны үшін авиакомпанияларды жауапкершілікке тартуға қатысты

Азаматтық авиация комитеті Индустрия және инфрақұрылымдық даму министрі Қайырбек Өскенбаевтың тапсырмасы бойынша рейстерді кешіктіру кезінде жолаушылардың құқықтарын бұзғаны үшін авиатасымалдаушыларды жауапкершілікке тарту бойынша жұмысты жалғастыруда.

Осылайша, биыл тамыз айының үшінші онкүндігінде «Эйр Астана» әуекомпаниясына (құрылымдық бөлімшесі «Fly Arystan» әуекомпаниясы, - ред.) қатысты рейстерді кешіктіру кезінде жолаушылар құқығын бұзғаны үшін 2 000 АЕК (6 126 000 теңге) көлемінде қосымша екі айыппұл салынды.

Осы жылдың шілде айынан бастап «Эйр Астана» әуекомпаниясына қатысты жалпы сомасы 6 000 АЕК (18 378 000 тг) алты айыппұл салынды. «SCAT» әуекомпаниясы рейс кідірген кезде жолаушылардың құқықтарын бұзғаны үшін 1 000 АЕК (3 063 000 тг) көлемінде айыппұл түрінде әкімшілік жауапкершілікке тартылды. Сонымен, қазақстандық әуекомпаниялар жеті рет 7 000 АЕК (21 441 000 тг) сомасына әкімшілік жауапкершілікке тартылды.

Азаматтық авиация комитеті Қазақстан Республикасының қолданыстағы заңнамасының жолаушылар құқықтарын сақтау бөлігіндегі талаптарын ұстанады. Тасымалдаушылар тарапынан қайталап бұзушылық фактілері анықталған жағдайда шаралар қабылданатын болады.