Қоршаған ортаны ластағаны үшін «ҚазАзот» мекемесіне 6 млн теңге көлемінде айыппұл салынды. Бұл туралы Маңғыстау облыстық экология департаменті басшысының орынбасары Мақсат Айсин брифинг барысында айтты, деп хабарлайды Halyq Uni тілшісі.

Маңғыстау облысы бойынша экология департаменті «ҚазАзот» АҚ-ға жоспардан тыс тексеру жүргізіп, аммиак көлемі рұқсат етілген шекті концентрациядан асып кеткенін анықтады.

Тексеру Басқұдық ауылы тұрғындарының шағымы бойынша жүргізілген.

Оның барысында құрамында аммиак бар суды заңсыз ағызу фактісі анықталды. Бұл жаңадан салынған «ҚазАзот» АҚ «Залалсыздандыру және булану бөлімі» нысанын пайдалануға берілген кезде орын алып отыр. Осы фактілер бойынша департамент мамандары су сынамаларын алып, атмосфералық ауаны өлшеді. Жүргізілген талдау нәтижесі судың құрамындағы зиянды заттардың және атмосфералық ауадағы аммиак нормаларының рұқсат етілген шекті концентрациядан асып кеткенін көрсетті – деді Мақсат Айсин.

Аталған экологиялық заңнаманы бұзу фактілері бойынша «ҚазАзот» АҚ ҚР ӘҚБтК-нің 331-бабының 1-бөлігі және 328-бабының 1-бөлігі бойынша әкімшілік жауапкершілікке тартылды.

Сондай-ақ кәсіпорынға заңбұзушылықты жою жөнінде нұсқама берілді.

Еске сала кетсек, бұған дейін Ақтауға жақын тұрған Басқұдық ауылының тұрғындары аммиактың иісіне тұншығып отырғаны туралы хабарлаған едік.