Тараз қаласы Полиция басқармасының қызметкерлері Ұлттық ұлан әскери жасақ қызметкерлерімен бірлесіп, қала аумағында жоғалған атыс-қаруларын іздестіру жұмыстарын жалғастырып жатыр.

Тәртіп сақшылары қаланың барлық қараусыз қалған нысанын, мөлтек аудандардың жертөлелері мен шатырларын тексеруде. Қылмыскерлер ұрланған қаруды тіпті қала аумағындағы зираттарға жасырып қойған. Қызметтік иттер де іздеу жұмыстарына қосылған. Иіс сезгіш иттер полицейлерге қару мен оқ-дәрілерді тезірек табуға көмектеседі, – делінген ақпаратта.

Іздестіру шаралары барысында бір апта ішінде барлығы 15 қару табылған. Атап айтқанда, үш Калашников автоматы, алты аңшы мылтығы, үш Макаров тапаншасы, үш травматикалық тапанша және әртүрлі калибрдегі 1000-ға жуық патрон табылған.

Анықталғандай, қару-жарақтың барлығы сот-баллистикалық сараптамаға жіберілді.