Түркістан облысында 130 келіге жуық балық аулаған браконьерлер ұсталды
Олардан бір қайық пен балық аулауға арналған ау тәркіленді
![](https://halyq-uni.kz/cache/imagine/1200/uploads/news/2022/02/02/61fa1dea5f3c1077636841.jpg)
Түркістандық полицейлер заңсыз 128 келі балық аулаған браконьерлерді құрықтады. Түркістан облысы полиция департаменті табиғатты қорғау полициясының қызметкерлері жедел алдын алу іс-шаралары барысында Шардара су қоймасында браконьерліктің кезекті жайтын анықтады.
Сағат 16:00 шамасында рейдтік іс-шаралар кезінде Шардара ауданы полиция басқармасының полицейлері Арал-Сырдария облысаралық инспекция өкілдерімен бірге су қоймасының жағасында заңсыз балық аулаумен айналысқан екі браконьерді ұстады. Олар Шардара қаласының тұрғындары болып шықты, – делінген ақпаратта.
Тәртіп сақшылары күдіктілерден бір қайық, 500 метр балық аулауға арналған ау мен 128 келі сазан балығын тәркіледі.
Қазір аталған жайт бойынша қылмыстық кодекстің 335-бабы (балық ресурстарын, басқа да су жануарларын немесе өсімдіктерін заңсыз өндіру) бойынша сотқа дейінгі тергеу амалдары жүргізілуде. Оқиғаның мән-жайы анықталып жатыр.