Ас қорыту жолдарының аурулары құрылымында бауыр циррозы бірінші орында тұр
Денсаулық сақтау министрлігінің бас гепатологы Күлпәш Қалиасқарова елімізде бауырдың қатерлі ісігінен жыл сайын 600-дей адамның көз жұматынын мәлімдеді деп хабарлады baq.kz тілшісі.
Статистикаға сенсек, Қазақстанда 2018 жылы бауырдың қатерлі ісігіне 1020 адам шалдыққан. Бұл дегеніміз 100 мың адамға шаққанда 5,5-ті құрайды. Сондай-ақ ол жылы 588 адам қайтыс болған. Бұл көрсеткіш 100 мың адамға шаққанда 3,2-ні құрайды.
Ал 2019 жылы бауырдың қатерлі ісігіне шалдыққандар көрсеткіші 1012 адамға тең болды. Оның 100 мың адамға шаққандағы көрсеткіші – 5,4. Дерттен 642 адам қайтыс болған, өлім-жітім көрсеткіші – 3,4-ке тең.
Былтыр бауырдың қатерлі ісігіне шалдыққандар көрсеткіші 861 адам болды. 100 мың адамға шаққандағысы – 4,6. Оның ішінде 580 адам қайтыс болған.
Күлпәш Қалиасқарованың айтуынша, коронавирус пандемиясының салдарынан вирустық гепатиттен қайтыс болғандардың саны артқан.
«Бүгінде бұл диагноз өлім-жітімнің ТОП 10 себебіне кіреді. Ал ас қорыту жолдарының аурулары құрылымында бауыр циррозы бірінші орында тұр. Е гепатиті жүкті әйелдердің 20 пайызында өлімге әкелуі мүмкін. Бауыр циррозына әкелетін себептердің арасында вирустық гепатит, бауырдың алкогольдік және алкогольсіз майлы зақымдануы, сондай-ақ бауырдың аутоиммунды және метаболикалық аурулары жетекші орын алады», - дейді дәрігер.