Нұр-Сұлтанда полицейлер мен кітапханашылардың, әлеуметтік қызметкерлердің жалақысы өсті. Бұл туралы елорда әкімі Алтай Көлгінов Instagram-дағы парақшасында жазды.

Биыл 1 маусымнан бастап әлеуметтік, мәдениет (кітапханалар, мұражайлар), спорт, жергілікті полиция қызметі және тағы басқа мамандардың жалақысы көтерілді. Осылайша елорда мекемелерінде жұмыс істейтін 4 мыңға жуық маман қамтылды, - деп жазды Алтай Көлгінов.

Оның айтуынша, әлеуметтік мекемелер, медициналық-оңалту орталықтары, кітапхана және тағы басқа орындарда жұмыс істейтін, жалақысы төмен қызметкерлердің еңбекақысы 30%-дан 50%-ға дейін көбейді.

Осыған байланысты қала әкімі сөзіне мысал келтірді:

• «Жанұя» отбасы институтын қолдау орталығы және «Белсенді ұзақ өмір сүру орталығы» әлеуметтік қызметкерлердің жалақысы 1,5 есе өсті;
• Кітапханашылардың жалақысы 30%-дан аса («Орталық кітапхана жүйесі» мекемесі), суретшілердің жалақысы 50%-ға өсті;
• Жергілікті полиция қызметінің жалақысы 30%-ға дейін көтерілді, азаматтық қызметкерлер (С, D санаттары және разрядтаушылар) 1,8 есе өсті.

Айта кетейік, осыған дейін президенттің тапсырмасына сәйкес медицина қызметкерлерінің, педагогтардың, коммуналдық кәсіпорын қызметкерлерінің жалақысы көтерілген еді.