Мемлекет басшысы Қасым-Жомарт Тоқаевтың төрағалығымен Президент әкімшілігі, Қауіпсіздік кеңесі, Бас прокуратура, Ұлттық қауіпсіздік комитеті, Қорғаныс және Ішкі істер министрліктері басшыларының кеңесі өтті.

Кеңес отырысында қауіпсіздік пен құқықтық тәртіпті қайта қалпына келтіруге, азаматтардың заңды құқықтарын қамтамасыз етуге баса мән берілді.

Ішкі істер министрі Ерлан Тұрғымбаев халықтан заңсыз сақтап отырған қаруларын алу ісі жалғасып жатқанын, терроризм, кісі өлтіру, билік өкілдеріне зорлық-зомбылық көрсету, бұзақылық, мемлекеттік органдардың ғимараттарына шабуыл жасау және басқа да қылмыстар бойынша 1 822 қылмыстық іс қозғалғанын айтты. Оның 116-сы арнаулы прокурорларға жолданған.

Министрдің айтуынша, ұсталған азаматтардың конституциялық құқықтарының бұзылуына жол бермеу мақсатында құқық қорғау ұйымдарымен тығыз ықпалдастық орнатылған.

Ұлттық қауіпсіздік комитетінің төрағасы Ермек Сағымбаев лаңкестік қауіптерді жою және келешекте ондай қатерлерге жол бермеу механизмдерін әзірлеу жөніндегі шаралар туралы баяндады.

Қорғаныс министрі Руслан Жақсылықов қазіргі уақытта Қарулы күштердің жекелеген бөлімшелері ішкі істер органдарымен бірлесіп, террористік қауіптің «қызыл» деңгейінде тұрған өңірлерде құқықтық тәртіпті қамтамасыз ету жөніндегі міндеттерін орындауды жалғастырып жатқанын баяндады. Әскери нысандардың, соның ішінде қару-жарақ және оқ-дәрі қоймаларының күзеті күшейтілген.

Қорғаныс министрлігі Қарулы күштерді реформалау жөніндегі тапсырманы орындауға кіріскен.

Бас прокурор Ғизат Нұрдәулетов терроризм мен жаппай тәртіпсіздік деректері бойынша жүргізіліп жатқан тергеу амалдарының барысы туралы есеп берді. Сонымен қатар ұсталған және тұтқындалған азаматтардың құқықтарын қамтамасыз ету үшін прокурорлардың қабылдаған шаралары жөнінде баяндады. Ғизат Нұрдәулетовтің айтуынша, олардың бәрі қорғау, заңды көмек алу, шағым жасау құқығымен қамтамасыз етіліп жатыр. Прокуратура органдарына қаңтар оқиғасына қатысқан азаматтардан 84 шағым түскен. Қадағалау шаралары бойынша ұсталған 96 адам босатылған.

Сонымен қатар қадағалау органының жетекшісі нақты дәлелі жоқ жағдайларда жазаны жеңілдету жөніндегі тапсырманың орындалу барысы туралы есеп берді. Берілген мәліметтер бойынша әкімшілік тәртіпке сәйкес соттардың шешімімен 3314 адам тұтқындалған. Прокурорлар 1884 іске қатысты жазаны жеңілдету жөнінде өтініш берген. Оларды тексеру нәтижесінде 1083 адам тұтқыннан босатылған. 493 азаматқа салынған айыппұл ескерту жазасына ауыстырылған.

Баяндамаларды тыңдаған Мемлекет басшысы болған оқиғаның барлық мән-жайын анықтау жұмыстарын жалғастыру қажет екенін айтты.

Қасым-Жомарт Тоқаев ақпарат саласындағы күштік құрылымдар мен өкілетті органдар күш-жігерлерін үйлестіріп, жұртшылық тарапынан түсетін сауалдарға жедел жауап беруге тиіс екеніне тоқталды.

Мемлекет басшысы тұрғындардың қазасына қатысты мәселе бойынша Бас прокуратураға және Ішкі істер министрлігіне әрбір жағдайды мұқият тергеп-тексеру жөнінде тапсырма берді.

Жұртшылықтың болған оқиғалар жөнінде долбар мен қауесетке негізделген пікір қалыптастыруына жол беруге болмайды. Азаматтар биліктің ашықтық пен заңдылықты қамтамасыз етіп отырғанын көруге тиіс, – деді Мемлекет басшысы.