Мемлекет басшысына Нұр-Сұлтан қаласының әкімі Алтай Көлгінов қаланың дамуына байланысты ақпарат берді. Бұл туралы Ақорданың баспасөз қызметі хабарлады.

Қасым-Жомарт Тоқаевқа бірінші жартыжылдықтың қорытындысы бойынша елорданың әлеуметтік-экономикалық және инфрақұрылымдық дамуы туралы ақпарат берілді. Президентке кезекте тұрған азаматтар үшін қолжетімді тұрғын үй құрылысын ұлғайту, жаңа мектептер салу арқылы үш ауысымды оқу проблемасын шешу, автомобиль көпірлері мен жолдар салу, үлестік құрылыс нысандарын аяқтау, газ тарту мәселесі, тұрғын-үй алаптарын дамыту, жеке инвестициялар тарту жөнінде баяндалды.

Сонымен бірге Алтай Көлгінов сорғы-сүзу станциясының (ССС-3) құрылысы туралы да айтты. Қазір қаламыз тәулігіне 300 мың текше метр су тұтынады, ал ССС-3 іске қосылса тәулігіне 100 мың текше метрден астам қосымша су береді.

Қала әкімінің айтуынша, жылумен жабдықтау қуатын арттыру үшін ЖЭО-3 құрылысы, газ қазандықтарын жобалау жұмысы жүріп жатыр. Газ қазандықтары іске қосылғанда ЖЭО-3 қуаты 3 еседен де асатын болады. Бұл құрылысы жүріп жатқан болашақ аудандарды жылумен қамтуға мүмкіндік береді.

Сонымен қатар кәріз тазарту құрылыстарын жобалау (КТҚ-2), инженерлік желілерді жаңғырту, қосалқы электр станцияларын жаңалау жұмыстары жүріп жатыр. Бұған қоса биыл елордада тағы 200-ден аса аула мен қоғамдық демалыс орындары жаңартылатыны айтылды.

Мемлекет басшысы жалпы әкімдік жүргізіп жатқан жұмыстарды қолдады. Алтай Көлгіновке елорданың инфрақұрылымын дамытып, абаттандыру жұмыстарын жалғастыруды, қала тұрғындарының түйткілді мәселелерін шешуді тапсырды.