Марқұмның артында әйелі мен 2018 жылғы туған баласы қалды
«Майқайыңалтын» кәсіпорнында мотор жөндеуші болып еңбек еткен 1992 жылғы азамат абайсызда қаза тапты. Ол техниканы жөндеу кезінде үстінен кен тиегіш машина жаншып кеткен, деп хабарлайды Halyq Uni Kazinform-ға сілтеме жасап.
Қайғылы оқиға 14 желтоқсанда түстен кейін болған.
Алтын шахтасында көп жылдардан бері мотор жөндеуші болып еңбек еткен азамат көлік құралын жөндеу кезінде көз жұмды. Куәгерлердің айтуынша, ол кенішке түсіп, істен шығып тұрған техниканы қарап жатқанда екінші кен тиегіш көлік абайсызда жаншып кеткен. Марқұмның отбасы бар, соңында әйелі мен 2018 жылғы туған баласы қалды, - деді Баянауыл ауданы Майқайың кентінің әкімі Ербатыр Молдатаев.
Сондай-ақ Павлодар облыстық ПД баспасөз қызметі абайсызда адам өліміне әкеп соқтырған қауіпсіздік техникасы ережелерін бұзу дерегі бойынша қылмыстық іс қозғалғанын мәлім етті.
Техниканың жүргізушісі анықталып, полиция бөліміне жеткізілді. Оқиғаның мән-жайы мен себептері тергеу барысында анықталады, - делінген полиция хабарламасында.
Мемлекеттік еңбек инспекциясы комитетінің Павлодар облысы бойынша департаменті басшысының міндетін атқарушы Абылай Сабыров та жазатайым оқиғаға қатысты тергеп-тексеру шаралары ұйымдастырылатынын хабарлады.
Қазір оқиғаны тергеу комиссиясы құрылып жатыр. Біздің басқарманың өкілдері оған жетекшілік етеді немесе комиссия құрамына енеді. Әзірше оқиғаның мән-жайы туралы айта алмаймыз, - деді ол.