Қаржылық мониторинг агенттігі еліміздің екі өңірінде есепке алу-бақылау маркалары жоқ 150 мыңға жуық темекіні анықтады, деп хабарлайды Halyq Uni.

ҚМА Ақтөбе облысы бойынша департаменті заңсыз кәсіпкерлік қызметті жүзеге асыру фактісі бойынша Қырғызстан азаматына қатысты сотқа дейінгі тергеп-тексеруді жүргізіп жатыр.

Мәселен, «Жайсан-авто» бекетінде Қазақстан аумағынан шығып кету әрекеті кезінде жүк көлігінің жүргізушісі ұсталды. Оның шанағын тексеру кезінде акциздік маркалары жоқ, көкөністерде (пекин қырыққабаты) жасырылған жалпы саны 70 мыңнан астам қорап темекі өнімдері табылды, – деп қосты агенттік.

Мемлекеттік кірістер органдарының деректеріне сәйкес, төлеуге жататын акциздік алым сомасы 22,6 млн теңгені құрайды. Қазір тергеу әрекеттері жүріп жатыр. Жүк көлігі арнайы автотұраққа қойылды және тәркіленуге жатады.

Бұдан басқа, Қарағанды облысында есепке алу-бақылау маркалары жоқ темекі өнімдерін сатушы сотталды.

Анықталған қойманы тінту барысында жалпы құны 18,5 млн теңгені құрайтын 71 мыңнан астам қорап темекі табылып, тәркіленді. Контрафактілік темекі өнімдері жойылды, – деп толықтырды ведомство.

Жалпы, жыл басынан бастап Қаржылық мониторинг агенттігі өндірісінде темекі өнімдерінің айналымына байланысты 62 қылмыстық іс болды, оның 35–і сотқа жіберілді. Барлығы 11 млрд теңгеден астам сомаға 22 млн қорап темекі тәркіленді.

ҚМА акцизделетін темекі бұйымдарын акциздік маркаларсыз ірі мөлшерде өткізу қылмыстық жауапкершілікке әкеп соғатынын ескертеді (ҚР ҚК 214-бабы).