Көкшетау қаласында полиция отандық сериалдарға түскен актерді есірткі сатумен айналысты деген күдікпен ұстады, деп хабарлайды Halyq Uni Polisia.kz-ке сілтеме жасап.

Тінту барысында оның пәтерінен электронды таразы, арнайы жабдықтар және жалпы салмағы 1,5 келіге жететін мефедрон мен аlfa-PVP синтетикалық есірткісі тәркіленді.

Қылмыстық әрекеттің дәлелдерін тереңдете зерттеу үшін күдіктінің телефоны тексеріліп, есірткі жасырылған орындардың нақты координаттары анықталды. Соның нәтижесінде 4 500 доза есірткі айналымға түспей, дер кезінде тосқауыл қойылды.

Тергеу барысында белгілі болғандай, күдікті бұған дейін отандық сериалдарға түскен. Ол өз кінәсін толық мойындап, қазір уақытша ұстау изоляторына қамалды. Құзырлы органдар сотқа дейінгі тергеуді жалғастырып жатыр.