Статистика жарияланды
Қазақстанда 13,2 мыңнан астам шетел азаматы жұмыс істейді, деп хабарлайды Halyq Uni.
2024 жылғы 1 қарашадағы жағдай бойынша, жергілікті атқарушы органдардың рұқсатымен ел аумағында 13 246 шетел азаматы еңбек етеді, деп мәлімдеді Еңбек және халықты әлеуметтік қорғау министрлігі.
Шетел жұмыс күшін (ШЖК) тартуға рұқсаттардың арасында мынадай санаттар бар: басшылар мен олардың орынбасарлары үшін 543 рұқсат (бірінші санат), құрылымдық бөлімшелердің басшылары үшін 2 514 рұқсат (екінші санат). Тартылған ШЖК негізгі бөлігі үшінші (мамандар) әрі төртінші (білікті жұмысшылар) санаттарға жатады – тиісінше олар 4 859 және 917 адам. Сондай-ақ, маусымдық жұмыстарға 1 120 адам, ал корпоративтік ауыстыру аясында 3 293 адам тартылды, – деп қосты ведомство.
Қазір Қазақстанда ШЖК пайдаланатын 1 789 жұмыс беруші бар. Оларда 389,8 мыңнан астам еліміздің азаматы жұмыс істейді. Бұл қызметкерлердің жалпы санының 96,8%-ы.
Экономикалық қызмет түрлері бойынша ең көп жұмыс істейтіндер құрылыс саласында – 5 155 адам, өңдеу өнеркәсібі – 1 387 адам, әкімшілік пен көмекші қызметтер – 1 363 адам, тау–кен өнеркәсібі әрі карьерлерді қазу – 1 359 адам, ауыл, орман және балық шаруашылығы – 1 168 адам.
Еңбек мигранттары келетін негізгі елдер: Қытай – 4 664 адам, Өзбекстан – 1 230 адам, Түркия – 1 150 адам, Үндістан – 1 108 адам.
Ішкі еңбек нарығын қорғау мақсатында Еңбек және халықты әлеуметтік қорғау министрлігі жыл сайын республикаға шетел мамандарын тартуға квота белгілейді және бөледі. 2024 жылы жалпы квота республикадағы жұмыс күшінің санына қатысты 0,23% немесе 17,2 мың бірлік мөлшерінде белгіленді.