10 маусымда Ақтау қалалық соты кәмелетке толмаған қызын өлтіруіне байланысты И. есімді азаматшаға қатысты қылмыстық істі қарады. Бұл туралы қалалық соттың баспасөз қызметі хабарлады.

Іс материалдарына сәйкес, ағымдағы жылдың 4 қаңтарында әйел кәмелетке толмаған қызын ұрып, күшпен итеріп жіберген. Бала ішін үстелдің бұрышына соғып, салдарынан гематома пайда болды. Арада төрт күн өткенде, яғни 8 қаңтарда таңғы сағат 02:00 шамасында анасы ашу үстінде қызының іш тұсынан тағы да жұдырықпен ұрған. Артынша ол баланы үйіне қалдырып, өзі кетіп қалған. Екі жарым сағаттан кейін жас бала алған жарақаттан қайтыс болды.

Сот-медициналық сараптамасының қорытындысына сәйкес, Н. есімді қыз іш тұсына алған соққы нәтижесінде туындаған қан кетуден көз жұмды, – делінген хабарламада.

Сот үкімімен әйел ҚР Қылмыстық кодексінің 106-бабының 3-бөлігі «Абайсызда жәбірленушінің өліміне әкеп соққан денсаулыққа қасақана ауыр зиян келтіру» бойынша кінәлі деп танылып, 8 жылға бас бостандығынан айырылды. Ол жазасын орташа қауіпсіздіктегі қылмыстық-атқару жүйесі мекемесінде өтейтін болады.