Солтүстік Қазақстан облысының тәртіп сақшылары artemia salina шаяндарын заңсыз аулаған күдіктілерді құрықтады, деп хабарлайды Halyq Uni.

Polisia.kz мәліметінше, облыстық полиция департаменті ұйымдасқан қылмысқа қарсы күрес басқармасы қызметкерлерінің назарына үш адамнан тұратын топ көзге түсті. 33 және 22 жастағы екі петропавлдық, сондай-ақ Қызылжар ауданының 33 жастағы тұрғыны артемия салина шаяны жұмыртқаларын заңсыз аулаған деген күдікке ілігіп отыр.

Олар мақсатты жедел іс-шаралардың нәтижесінде ұйымдасқан қылмысқа қарсы іс-қимыл басқармасының, 6637 әскери бөлімінің әскери қызметшілері және облыстық прокуратураның үйлестіруімен өзара іс-қимыл жасау кезінде қолға түсті, – делінген ақпаратта.

Заңсыз өндіру Мамлют ауданы аумағындағы Меңкесер тұзды көлінде жүргізілген. Сақшылар оқиға орнынан жалпы салмағы 460 келіні құрайтын 6 қапқа салынған шаян жұмыртқалары тәркіленді. Жүргізілген сараптама мемлекетке келтірілген зиянды 3 миллион 712 мың теңгеге бағалады.

«Заңнама талаптарына сәйкес, топ құрамында балық ресурстарын, басқа да су жануарларын немесе өсімдіктерді заңсыз аулау 6 жылдан 10 жылға дейінгі мерзімге бас бостандығынан айыру түріндегі қылмыстық жауапқа әкеп соғады», – дейді Солтүстік Қазақстан полиция департаменті бастығының орынбасары Асқар Мұхаметқалиев.