Ұлттық Олимпиада комитетінің президенті Геннадий Головкин жұмыс сапарымен Лос-Анджелестегі (АҚШ) 2028 жылғы Олимпиада ойындарының ұйымдастыру комитетіне барды, деп хабарлайды Halyq Uni.

Кездесу аясында Ойындарға қатысатын спортшыларға жасалатын жағдай мен Қазақстан мен АҚШ арасындағы спорт саласы бойынша ынтымақтастық мүмкіндігі талқыланды. 

Геннадий Головкин алдағы Олимпиада ойындары тарихтағы маңызды кезең болатынын, ол халықаралық спорттық байланысты нығайтуға септігін тигізетініне сенім білдірді. 

Лос-Анджелестегі Олимпиада ойындарын ұйымдастыру комитетіне уақыт бөліп, мультиспортты оқиғаны өткізуге қатысты өзекті әрі мазмұнды ақпарат ұсынғанына алғыс білдіреміз. Ұйымдастыру комитетіне келгеніміз біздің нәтижелі ынтымақтастық орнатуға дайын екенімізді білдіреді, - деді Ұлттық Олимпиада комитетінің президенті.

Алдағы Олимпиада ойындарының ұйымдастыру комитеті Қазақстан делегациясына жарыстар кезінде қолданылатын басты инфрақұрылым нысандарын, оның ішінде Олимпиада ауылы мен спорттық аренаны көрсетті. 

2028 жылғы Лос-Анджелестегі Олимпиада ойындарының өкілдері ірі спорттық іс-шараларды ұйымдастырудағы тәжірибесін бөлісіп, бұл процесске енгізілген инновацияға назар аударды. 

Ұлттық олимпиада комитеті Олимпиаданы ұйымдастыру комитетімен ынтымақтастықты жалғастырады.