Тағы бір есірткі қылмысы тіркелді
Жамбыл облысының тұрғынынан 35 келіден астам кептірілген марихуана тәркіленді, деп хабарлайды Halyq Uni.
Polisia.kz мәліметінше, көлік полицейлері есірткі заттарын өткізіп, тасымалдаған Жамбыл облысының тұрғынын қолға түсірді.
4 қазанда көліктегі полиция департаментінің қызметкерлері «Қарасора – 2024» жедел-профилактикалық іс-шарасын жүргізу барысында Жамбыл облысының «Аспара» станциясы өткелінде 28 жастағы облыс тұрғынын анықтап, құрықтады. Одан салмағы 19 келіден асатын кептірілген марихуана табылып, тәркіленді. Сондай-ақ тексеру барысында ұсталған азаматтың тұрғылықты жерінен салмағы 16 келіден асатын кептірілген марихуана салынған қап алынды. Тәркіленген есірткі затының жалпы салмағы 35 келіден асты, – делінген ақпаратта.
Қазір бұл факт бойынша сотқа дейінгі тергеу амалдары жүргізіліп жатыр. Қылмыстық іс жүргізу кодексінің 201-бабына сәйкес, өзге ақпаратты жария етуге болмайды.
Көлік полицейлері есірткі қылмысына қарсы іс-қимыл және нашақорлықтың алдын алу бойынша кешенді жұмыстар жүргізіп жатыр. Осы жылдың 9 айында 303 есірткі қылмысы анықталды, оның 28-і өткізу болса, 9-ы контрабанда фактісі. Заңсыз айналымнан 167 келі түрлі есірткі заты тәркіленді.