Бүгін қазақстандықтар Еңбек күнін атап өтіп жатыр
Еңбек күніне орай жастар арасында 200 іс-шара өткізілді, деп хабарлайды Halyq Uni.
Еңбек күні аясында елімізде жастардың қатысуымен дөңгелек үстелдер, бос жұмыс орындары жәрмеңкелері, экологиялық іс-шаралар, кәсіптік бағдар беру кездесулері, «Адал азамат – адал еңбек» диалог алаңдары сияқты екі жүзден астам шара ұйымдастырылды, деп мәлімдеді Мәдениет және ақпарат министрлігі.
Әсіресе, еңбек адамдарын кеңінен насихаттауға баса назар аударылды. Осы мақсатта Абай ауданында «Еңбекші жастар – 2024» пен Қарағанды облысында «Шебердің қолы алтын» атты фестивальдер өтті, – деп қосты ведомство.
Сондай-ақ, бірқатар өңірде «Жасыл ел» жасақтарының сарбаздары жұмыс маусымын салтанатты түрде қорытындылады.
Еңбек күніне арналған іс-шараларға барлығы екі мыңнан астам жас тартылды. Атаулы күн қыркүйектің соңғы жексенбісіне бекітілген.